Exchange Guide

大學生身份只有短短四年，當然要趁自由自在嘅時候出去闖盪一下。如果你計劃緊長期獨遊或者準備去exchange，就要睇吓小編整理好嘅租樓注意事項，確保自己旅程途中住得舒服又安全！
 

睇樓前準備

居住地區資料搜集

如果你已經有心水想住某個地區，記得要做進一步資料搜集，了解吓嗰個地區嘅交通、治安、生活配套如何。仲要記得預先了解一下當地嘅租盤行情，避免到時俾中介同屋主收貴咗租金，必要時仲可以殺吓價添。

家電檢查清單

外面嘅租盤始終同學校宿舍唔同，住宿舍的話可以共用電器，但係自己住就冇呢支歌仔唱喇。所以最好寫定張家電checklist，睇樓嘅時候睇吓設備係咪齊全，以免住落咗之後先發現冇某種家電，生活唔方便之餘，又要自己俾錢買。

睇樓時

地理位置

睇樓前做嘅資料搜集未必準確，所以最好叫屋主/中介帶你行埋租盤附近一帶，觀察吓衛生情況（垃圾站、街道整潔）同埋治安環境（街燈、閉路電視、警署等等）。最安全嘅做法就係分別早晚去睇一次樓盤，可能會發現到其他潛在問題，例如噪音滋擾。

屋內衛生保養

記得檢查家電係咪運作到，尤其係熱水爐、冷氣、抽氣扇等等。如果發現有問題嘅話，要即時同業主反映，避免到時產生責任上嘅爭拗。至於家居衛生方面，可以留意牆上面有冇霉菌，廚房同廁所會唔會有小強。
 

同屋主傾吓計

睇樓嘅時候除咗講有關租盤嘅嘢，最好試下同佢接觸多啲，了解業主係咩人。如果發現業主嘅性格或者處事方式好有問題，你就要諗吓要唔要簽約。畢竟業主太麻煩嘅話，好多居住上嘅小問題都會比較難解決。

簽約之前

首先要要求業主出示證明文件（身份證、房產證明等等），確認呢宗交易係合法正當。另外要傾好水電費等雜項由邊一方負擔，中介費、按金同租金金額都要再次確認。如果遇到唔清楚嘅地方一定要提出，保障翻自己嘅權益。
 
希望大家新一年可以實現一個人出遊嘅目標之餘，玩得平平安安又開心啦！

延伸閱讀：

【Exchange秘笈】TransferWise與各大銀行外幣交易服務比較

Exchange慳錢必備之國際學生證

【窮遊系列】Hostel點揀先唔中伏？！

【大學生專利】讀大學嗰陣做會更平嘅3樣人生大事！